دروستکەری Crimson Desert زیاتر پشت بە AI دەبەستێت
کۆمپانیای Pearl Abyss دەڵێت AI لە «هەموو ڕێڕەوی گەشەپێدان»ـدا بەکاردەهێنێت، و DokeV لە 2028 دەردەچێت.
کۆمپانیای کۆریای باشووریی Pearl Abyss، دروستکەری Crimson Desert و DokeV، ڕایگەیاندووە کە دەیەوێت AIی دروستکەر زیاتر لە پرۆسەی گەشەپێدانی یارییەکانیدا بەکاربهێنێت. بەپێی Eurogamer، کۆمپانیاکە ئەمەی لە نوێترین نامەی داهاتی چارەکییدا (Earnings Letter) ڕاگەیاندووە.
کۆمپانیاکە دەڵێت پێشتر سیستەمەکانی یاریی تەنها دوای جێبەجێکردنی دەستی پشتڕاست دەکردەوە، بەڵام ئێستا AI بەکاردەهێنێت بۆ ئەوەی چەمکە جیاوازەکانی دیزاین بە خێرایی و پێش جێبەجێکردنی ڕاستەقینە تاقی بکاتەوە. بە وتەی Pearl Abyss، ئەمە ڕێگە دەدات سەرچاوەکانی گەشەپێدان بە شێوەیەکی کاراتر دابەش بکرێن و خێرایی گشتیی بەرهەمهێنان زیاد بکات.
کۆمپانیاکە باسی لەوە کردووە کە AI لە چەند قۆناغێکی گەشەپێداندا بەکاردێت، لەوانە ئۆتۆماتیککردنی ئەرکە دووبارەبووەکان، پشتگیریی دروستکردنی ناوەڕۆک و باشکردنی تاقیکردنەوەکان، و ئێستا بەکارهێنانەکەی لە هەموو ڕێڕەوی گەشەپێدانیدا فراوان دەکات. لە هەمان کاتدا دەڵێت AI جێگرەوەی گەشەپێدەرە مرۆییەکان نییە و تەنها ئامرازێکە بۆ پشتگیریی پشتڕاستکردنەوەی چەمکەکان و باشکردنی بەرهەمهێنان. ئەزموونی سەرەکیی یاری و دروستکردنی ناوەڕۆکی ڕاستەقینەش بە تەواوی لەلایەن تیمی گەشەپێدانەوە بەڕێوە دەبرێن.
ئەم هەنگاوە دوای ئەو ڕووداوە دێت کە لە سەرەتای دەرچوونی Crimson Desert ڕوویدا. یاریزانان چەند وێنەیەکی گوماناویان لەناو یارییەکە دیتبوو کە وەک بڵێی بە AI دروستکرابن. Pearl Abyss دواتر ڕوونی کردەوە کە هەندێک «2D visual props» بە ئامرازەکانی AI دروستکراون و هەر لە سەرەتاوە ئامانج ئەوە بووە بە وێنەی دروستکراوی مرۆڤ بگۆڕدرێن، و زوو لە یارییە سەرکەوتووەکەدا لابران.
لە بەشێکی دیکەی نامەکەدا، کۆمپانیاکە دەڵێت DokeV، یاریی کۆکردنەوەی بوونەوەرەکانی، ئامانجی دەرچوونی لە نیوەی دووەمی 2028ـە و زانیاریی زیاتر لەسەری لە ناو ئەم ساڵدا ڕادەگەیەنرێت. DokeV لە سەرەتادا ئامانج وابوو لە 2023 دەربچێت. هەروەها Crimson Desert بۆ دەرچوون لەسەر Nintendo Switch 2 لە «نیوەی یەکەمی ساڵی داهاتوو»دا ئامادە دەکرێت.
بەکارهێنانی AIی دروستکەر لە دروستکردنی یاریدا چەند ساڵە بابەتێکی گەرمە، و لە مانگەکانی ڕابردوودا زیاتر بڵاوبووەتەوە، لەکاتێکدا ناوەڕۆکی بێبایەخی AI بە Steam دا بڵاودەبێتەوە و کۆمپانیا گەورەکانی وەک Epic Games بە ئاشکرا ئەم تەکنەلۆژیایە وەردەگرن. ڕاپۆرتێکی تازەش مەزندەی کردووە نزیکەی 40%ی گەشەپێدەرە چالاکەکان AI لە کارەکانیاندا بەکاردەهێنن.